بار و میرکان

شَه کَت بیومنه له په رّ شاران
تِوای بار بکه یم جیور جارِجاران

مَیلِم ئَلکِنیاس له ی رّووَه نیه
له ی شارِ بی عَترو بی بووَه نیه

هیورِمان هِوای میرکان کردیه
هوای دوزِله و شِوان کردیه

گُلِ سو نَه یمِن لَ بانِ بانکول
ئابادی خَه یمِن لَ میرکانِ چول

سِیه مال نَه یم لَه زَنگه و سیره گه
په رّ چالاوکَه و یا ئَنجیرَه گه

ئاوِ چالاوَیل کیشیمن وَه دول
ناخوا مه سازیمِ ئاو تی بوه سی گول

عه ترِ چَویرِ هیزه و ریونِ دان
توف و پنیرِ رّچِ کُلِنان

نانِ فه تیره و قایرمَه ی کاوِرّ
نیشان شِکانِن وه برّنَوِ دِرّ

توف و کشک بانِ دِوار نه یمِنَو
شه ویلِ زقوم ئاگِر که یمِنَو

منال و مه زِم له لیوِه کوانی
آرد گه نِم و په پِگ و خوانی

پَچیَه وَه چیتو گَه رچِگ‌ چنیمِن
پارینِک دَه ورِ آخِل کِنیمن

قارَّه قارِ وَه رک،زه قَ زه قِ کِیَه ر
پاقازه و پیچِگ ته رَّ و نانِ سیوَر

شِوانیل مَ وَه ن،په سیل وَه له وَرّ
له دولِ شه ن تا،بلینی کَه وَر

شه وار وَه وِ ریای تاسِفیدَه ی سو
قِوارتی دوشاو کره و نان و دو

دوزِله ژه نین ده نامِ هَورَه یل
دَنگ ئَلگَردانِ سینگِ کَورَه ی ل

شه وان سَه رَه لو،روژان وه قولان
بِگر بگِر و مه یدانِ زوران

بانکولِ زاگرِس بهَیشتِمانه
هه م مازِندَران هه م رَه یشتِمانه