مالِ دالِگم

 مالِ دالگم

سِماوه ری وه گُرّ بیو
هیزه ی له کِره پِرّ بیو

چایِ عه ترِ گُل وَه دَه مِ
هِساره،کو بی له چه مِ

رِخته و ده زینکِ ده سی
دو بوکِزِ فِره خه سی

زامه ت کیش و  زوان شرین
سِفره خسَه و رَنگین رَنگین

سوخمه رنگینَه گه ی وه ری
سه روینِ کَلهِری سه ری

له بار بارو وِهاران وِت
له ئیلاخ وله واران وِت

دلخارین بی ئِرا کُرّ ِ
بی ده نگ ئِرای مور مَه چِرّ ِ

خِنیه ی ده سی جیورِ زه رّیو
چه مه یلی عه سرین و ته رّیو

ده م ئَلپیچایو وه گولوَنی
هه روژ گیرِس ده فِه ی خه نی

دارِ تیوو ئه نجیره گَه
گیلاسه گه و ئه نگیوره گه

برّیانه گشتیان ده بِن
پِرَّه و بیه جایان له شِن

ملیوچگ دی لانه نیه که ی
په رّو پو وِی شانه نیه که ی

دی مه شکَه رامان نیه ژَنی
اسیرِ خاکه و نیه خَه نی

به شی بیه باخِ زه مین
مه زاری چه رداخِ زه مین

روحی رامان بودِن خه مین
سانِ سه ردی ناسَه سه رین

له و ناو حسارو سه کووَه
هیور و په ژاره گه ی کووَه

جا میلکانی سه رد و سِرَّه
دلم ‌له زیو خو خه م پِرَّه

بیت اله نوریان(ایلیاایلامی)